Vergilius, Bucolica

Sicelides Musae, paulo maiora canamus.
Non omnes arbusta iuvant humileque myricae.
Si canimus silvas, silvae sint consule dignae.

Ultima Cumaei venit iam carminis aetas,
magnus ab integro saeclorum nascitur ordo.
Iam redit et Virgo, redeunt Saturnia regna,
iam nova progenies caelo demittitur alto.
Tu modo nascenti puero, quo ferrea primum
desinet ac toto surget gens aurea mundo,
casta, fave, Lucina. Tuus iam regnat Apollo.

Teque adea decus hoc aevi, te consule, inibit,
Pollio, et incipient magni procedere menses.
Te duce, si qua manent sceleris vestigia nostri,
irrita perpetua solvent formidine terras.
Ille deum vitam accipiet, divisque videbit
permixtos heroas et ipse videbitur illis,
pacatumque reget patriis virtutibus orbem.